was mi aufregt (was mich so aufregt)

Ois ganz normala Bayer bin i zwar im Grund a Optimist, aber a paar Sachan regn mi scho wirkli ziemlich auf. Ob i deswegn scho a echta Grantla bin, des woas i ned (mei Frau und meine Kinda san se da eher sicha, aba des guit da ned).

Wia a imma, im Grund kon i da ja a gar nix dafür, weils oafach vui zvui Mist gibt, bei dem ma gar nimma anders ko, als dass ma se aufregt, a wenn i grad eigentli gar ned mog. Des oanzig guade dabei is, dass i den Schmarrn meistens glei wieda vergessen hob, weil’s einfach schena is, an die guadn Sachan zum denga und mei Hirn einfach ned gnua Blotz hod und deswegn Platz lassn muss, dass da Rest noch neibass’d.

Der oane oder andere moant zwar, dass es manchmal scho a bisserl z’vui is, was i da so gleich wieda vergiss, aber es gibt einfach trotz dem ganzen Wahnsinn so vui Sachan, die mi einfach frein, das is des bissl Platz in meim Hirn dafüa freihoitn muas.

Aber wann dann moi wieda gar nix huift, grad dann, dann san des die Sachan, die ma doch wieda heifan.

Merkur spielt Bild

wanninimmamengdad Posted on by

Da Merkur hod früher moi einfach dazuaghört, der war des Bladdl überhaupt, wenn ma wissen woit, was dahoam, ringsrum und auf da ganze Welt so grad wichtigs bassiert is. Hoit ebn grad koa Bild-Zeidung, die aus jedem Schmarrn a große Summa mit no greßere Buchstabn macht hod. A bissl ruhiga und entspannda holt. Des hod se aber ganz sche g’ändert. Jetzad machan die den gleich’n Blädsinn.

“Horror -Moment in Lufthansa-Flieger nach Miami” – so steht’s groß im Merkur! Was war aber wirkli los?

Wann ma’s genau nimmt, nachad eigentli ned wirkli vui. In am Fliaga von Minga nach Miami hod a Rauchmelda o’gschlagn und der Kappo hod gsagt, dass gescheider war um’z’drahn, bevor wirklich was ernsthaft bassiert. Des ham’s dann a g’macht, da Rauch war Bord wieda weg und zurück im Erdinger Moos hams am Schluss an kaputt Heizlüfter g’fundn. Scho da Wahnsinn, a echta “Horror”. Zumindest beim Merkur.

Ois wenn des no ned Unfug gnua gewesen war, da Krampf im Merkur gehd da erst richtig los. Und da Reporter Hot sich an Haufe Arbat g’macht und glei noch mehra soiche Katastrophen aufdeckt: “Ein ähnliches Szenario hatte sich bereits Anfang Januar abgespielt: Kurz nach dem Start in Los Angeles fängt das Triebwerk eines Boeing-Flugzeugs Feuer.” Guad, so ganz des gleiche war des jetzad ned direkt, aber immerhin kummt in beide Geschichtn a Flugzeug vor, des war’s dann aber a scho wieda. Scho da Hamma, so an Schmarrn zum schreibn, aber mit da Angst vo de Leid konn ma hoit guads Geld macha. . Irgendwo muas de Dramatik ja herkumma, da der ma das wahrscheinlich ned so ganz genau nehma.

Wer jetzt scho moand, dass der Krampf ned no mehr werd’n ko, der hod scho lang nimma in Merkur g’schaud. Da wern dann glei no angebliche “Sicherheitsprobleme am Flughafen München” ausgrab’n. Guad, es ham wirkli a paar Leid z’vui an Notausgang mit da normalen Tür verwechselt, aber was des mit am kaputtn Lüfte in am Fliaga zum doa hod, des was sicher bloss da Merkur.

Warum mi so was aufregt? Weil da mit da Angst vo de Leser g’spuit werd, da werde irgendwas hopplahopp z’samgeschriebn, was nix mitanand zum doa hod, damit’s glei no vui schlimma ausschaut und weils na imma no ned glangt (oda no mehr Platz zwischen da ganze Werbung irgendwie voll werdn muass) kommt einfach no was ganz anders dazu. Und ois bloss, damit d’ Angst nach nachlassd. Aber wen juckts, hauptsach es werd glesn.

Bloss a Kloanigkeit, aber mi regt so a Krampf einfach auf.

Airbus A380
Airbus A380 beim Start auf der nördlichen Startbahn in München

Da Airbus A380 is dabei aba scho a sauber Trum, a wenn Mia andere Fliaga besser g’foin..